Lögreglan íhugaði að óska eftir liðsinni frá Danmörku

Ríkislögreglustjóri íhugaði að leita liðsinnis dönsku lögreglunnar þegar mótmælin gegn ríkisstjórninni stóðu sem hæst. Þetta kemur fram í yfirlýsingu frá embættinu og einnig sagt að komið hafi til álita að flytja hingað til lands sérbúnar bifreiðar til þess að nota gegn mótmælendum. Þessir möguleikar voru kannaðir í fullu samráði við lögregluna á höfuðborgarsvæðisins og dómsmálaráðherra. Áður en til þess kom að ákveða nokkuð fjöruðu mótmælin út.

„Eitt af hlutverkum lögreglunnar er að tryggja öryggi borgaranna og lögreglumanna í starfi. Við þær aðstæður sem hér ríktu í janúarmánuði síðastliðnum lagði ríkislögreglustjóri til mannskap til löggæslustarfa bæði úr eigin liði og frá nálægum lögregluembættum auk þess að útvega lögreglunni á höfuðborgarsvæðinu margvíslegan búnað," segir meðal annars í yfirlýsingunni.

„Meðal þess sem ríkislögreglustjóri kannaði, meðan á þessu óvenjulega ástandi stóð, var hvort rétt væri að leita liðsinnis dönsku lögreglunnar og fá hingað til lands sérbúnar bifreiðar, en náið samstarf er á milli ríkislögreglustjóra Norðurlandanna. Þetta var kannað í fullu samráði embættisins, lögreglustjórans á höfuðborgarsvæðinu og dómsmálaráðherra. Sem betur fór lauk mótmælunum á friðsamlegum nótum og því var það sameiginleg ákvörðum þeirra sem að málinu komu að ekki væri þörf fyrir umræddar lögreglubifreiðar," segir einnig.

Ríkislögreglustjóri segir einnig að meðan á mótmælendunum stóð hafi verið mikið álag á lögreglumönnum og áréttar hann að þeir hafi staðið sig undantekningarlaust vel undir gríðarlegu álagi. „Lögreglan starfaði sem ein heild undir sameiginlegu skipulagi. Enginn ágreiningur var um markmið og leiðir og náið samstarf á milli embætta um aðgerðir."