Ekki hætta á að ESB tvístrist í kreppunni

Það verður að horfa til heimilanna, fyrirtækjanna og hins alþjóðlega fjármálamarkaðar þegar kostir og gallar evru eru metnir, segir Aðalsteinn Leifsson, lektor í viðskiptadeild Háskólans í Reykjavík. Hann telur ekki hættu á að efnahagsástandið muni tvístra evrópusambandinu, þrátt fyrir óánægjuraddir meðal annars á Írlandi.

Aðalsteinn segir margt svipað með Íslandi og Írlandi. Meginmunurinn liggi þó í aðild að Evrópusambandinu. Einn af fyrrverandi stjórnendum írska seðlabankans hefur sagt að ef Evrópusambandið komi Írum ekki til hjálpar í efnahagskreppunni, eigi Írar að hóta því að draga sig út úr Evrusvæðinu.

Hann gagnrýnir að Írar geti ekki stýrt genginu í landinu með hliðsjón af ástandinu heimafyrir. Aðalsteinn segir að vissulega séu bæði kostir og gallar við evru en þegar þeir eru metnir sé vert að líta til heimilanna, fyrirtækjanna og hins alþjóðlega fjármálamarkaðar. Aðalsteinn telur þó ekki neina hættu á að efnahagsástandið muni tvístra Evrópusambandinu.