Bréf Eiríks og Ingimundar birt

Seðlabankinn hefur nú birt svarbréf þeirra Eiríks Guðnasonar og Ingimundar Friðrikssonar til Jóhönnu Sigurðardóttur, en svarbréf Davíðs Oddssonar hefur þegar verið birt eins og flestir vita. Í bréfunum eru bankastjórarnir að svara tilmælum forsætisráherra um að þeir láti sjálfviljugir af störfum. Þeir Eiríkur og Davíð hyggjast ekki verða við þeirri bón en Ingimundur ætlar sér að hætta.

„Í sannleika sagt væri það mér mikill léttir að vera laus frá umræddu embætti," segir Eiríkur meðal annars í bréfi sínu. „I bréfinu er hins vegar gefið í skyn að ekki hafi verið staðið faglega að verki í Seðlabankanum og til að svo megi verða sé best að ég biðjist lausnar og láti af starfi þegar í stað, eins og þér greinduð frá í ríkissjónvarpinu sama dag og bréf yðar barst mér. Á þessari forsendu er mér mjög óljúft að biðjast lausnar," segir Eiríkur.

Hann segir ennfremur að það hafi hvarflað að sér að hætta í bankanum áður en skipunartími hans rennur út 30. apríl 2012. „Í stað þess að setja stjórn Seðlabankans í uppnám núna með tafarlausri breytingu á yfirstjórninni tel ég heppilegt að breytingar eigi sér hæfilegri aðdraganda svo ekki verði óþarfa röskun á starfseminni."

Ingimundi finnst vegið að æru sinni

Ingimundur fellst hins vegar á bón Jóhönnu en gagnrýnir þó innihald bréfs hennar. „Ég hef aldrei tekið þátt í stjórnmálastarfi né verið félagi í nokkurri stjórnmálahreyfingu. Ég get því með engu móti fallist á að „pólitísk sjónarmið" hafi „vegið þungt" við skipun mína í bankastjórn Seðlabanka Íslands á sínum tíma eins og gefið er í skyn," segir Ingimundur og bætir við að sér finnist ómaklega vegið að æru sinni í bréfi Jóhönnu „og í orðum sem þér hafi látið falla á opinberum vettvangi."

Að lokum segir Ingimundur: „Ég óska eftir lausn frá stöfum úr embætti bankastjóra við Seðlabanka Íslands frá og með 9. febrúar næstkomandi og afþakka boð yðar um „að ganga til viðræðna við stjórnvöld um starfslokagreiðslur."