Engar skýringar frá Bretum á beitingu hryðjuverkalaga

Geir Haarde forsætisráðherra segir að engar skýringar hafi enn fengist á því afhverju bresk stjórnvöld beitu hryðjuverkalöggjöf sinni gegn íslensku bönkunum í Bretlandi í kjölfar bankahrunsins hér á landi.

Þetta kom fram í máli Geirs Haarde í kjölfar fyrirspurnar frá Jóni Magnússyni þingmanni Frjálslyndra á alþingi rétt áðan. Jón spurði afhverju í ósköpunum íslensk stjórnvöld hefðu ekki leitað skýringa á athæfi Breta.

Í svari sínu sagði Geir Haarde að vissulega hefði verið leitað eftir skýringum frá breskum stjórnvöldum en þær hafi bara ekki fengist.

Mikill hiti hefur verið í ræðumönnum á alþingi í óundirbúnum fyrirspurnartíma við upphaf þingsins í dag. Hefur forseti alþingis margoft þurft að slá á bjöllu sína, svo ótt og títt á stundum að það hefur náð að yfirgnæfa hávaðan frá mótmælendum fyrir utan þinghúsið.