Kröftug mótmæli við Alþingishúsið

Rúmlega þúsund manns eru nú  á Austurvelli þar sem boðað hefur verið til mótmæla þegar þingfundur hefst á ný eftir jólafrí. Lögregla strengdi borða fyrir framan húsið og upphófust stimpingar á milli lögreglu og mótmælenda sem vildu fara inn fyrir borðann. Hópur fólks hefur einnig komið sér fyrir í Alþingisgarðinum.

Stimpingarnar fyrir framan húsið enduðu hins vegar með því að borðinn var að mestu rifinn niður og hefur fólkið nú fært sig nær þinghúsinu.

Gríðarlegur hávaði er á svæðinu enda var fólk hvatt til þess að hafa hátt og berja menn potta og pönnur í gríð og erg með tilheyrandi látum.