Endurreisn Gaza kostar 400 milljarða króna

Það mun kosta jafnvirði nærri fjögur hundruð milljarða króna að endurreisa Gaza að mati helsta ráðgjafa Hamas-stjórnarinnar á svæðinu. Í viðtali við fréttastofu segir hann að tryggja þurfi eðlilega vöruflutninga til og frá svæðinu eigi það ekki að leggjast í eyði.

Frá því vopnahlé Ísraela og Hamas-samtakanna á Gaza tók gildi um helgina hafa íbúar á svæðinu grafið í rústum eftir líkum ástvina sinna og snúið aftur til heimila sinna sem eru í mörgum tilvikum rústir einar. Ban Ki-moon, framkvæmdastjóri Sameinuðu þjóðanna, kom til Gaza í morgun til að kanna ástandið. Hann fer einnig til Suður-Ísrael til að skoða þau svæði sem urðu fyrir eldflaugaárásum herskárra Palestínumanna á Gaza. Þrettán hundruð Palestínumenn hafa fallið í árásum Ísraela sem hófust í lok desember og lauk aðfaranótt sunnudags. Fimm þúsund heimili munu hafa eyðilagst að sögn Hamas-liða, sextán opinberar byggingar og tuttugu moskur munu einnig rústir einar.

Doktor Ahmad Yousef er einn helsti ráðgjafi Hamas-stjórnarinnar á Gaza. Í viðtali við fréttastofu í morgun sagði hann að endurreisnarstarf á Gaza myndi kosta á bilinu tveir og hálfur til þrír milljarðar bandaríkjadala, jafnvirði nærri fjögur hundruð milljörðum íslenskra króna.

Yousef segir að endurreisnarstarfið taki langan tíma. Mestu skipti að opið verði fyrir flutning á byggingavörum til Gaza yfir landamærin frá Ísrael eða Egyptalandi. Verði svo ekki geti fólk ekki sótt sement og annað sem þurfi og þá sé hætta á því að bæir á Gaza leggist í eyði og verði draugabæir.

Nánar verður rætt við Ahmad Yousef í kvöldfréttum klukkan hálf sjö.