Ólík aðferðafræði við undirbúning

Munurinn á tillögunum tveimur er sá helstur að ríkisstjórnin vill að þingið feli henni að leggja inn umsókn en framsóknar- og sjálfstæðismenn vilja að utanríkismálanefnd undirbúi mögulega umsókn.

Í stjórnartillögunni er gert ráð fyrir að áður en aðildarviðræður hefjist verði víðtækt samráð haft við hagsmunaaðila um samningsmarkmið. Þá segir að fagleg viðræðunefnd verði skipuð af ríkisstjórn og að Alþingi setji á fót sérstaka nefnd er fari með samskipti þess við viðræðunefndina.

Hin tillagan ráðgerir að utanríkismálanefnd útbúi greinargerð um mikilvægustu hagsmuni Íslands og vinni vegvísi að mögulegri umsókn. Í greinargerð segir að þannig sé fullnægjandi fagleg umfjöllun um hagsmuni Íslands tryggð.