Handboltalöggur Norðurlandameistarar

Handboltalið lögreglunnar á Íslandi varð Norðurlandameistari í handbolta um helgina eftir að þeir sigruðu Noreg í æsispennandi leik. Mótið var haldið hér á Íslandi og meðal áhorfenda var Stefán Eiríksson lögreglustjóri á höfuðborgarsvæðinu. Hann segir að handboltalið lögreglunnar hafi staðið sig einstaklega vel.

„Liðið sigraði meðal annars með eftirminnilegum hætti á föstudaginn," segir Stefán en drengirnir sigruðu þá Dani á ótrúlegan hátt. Á endasprettinum var staðan 20 mörk gegn 25 fyrir Dönum og útlitið heldur svart fyrir íslensku lögregluþjónana. Þeir spýttu þó rækilega í lófana en leiknum lauk með sigri íslenska liðsins; 27 gegn 26 mörkum.

„Svo lögðu þeir Norðmenn á laugardeginum," segir Stefán stoltur af kollegum sínum en liðið samanstendur af hæfustu handboltalöggum landsins.

„Sem gamall íþróttafréttamaður þá get ég sagt að þetta var ótrúlega spennandi og vel af sér vikið hjá drengjunum," segir Stefán og bætir stoltur við: „Þetta sýnir að lögreglan á Íslandi stendur sig vel á öllum sviðum."