Sá smitaði var að koma frá New York

Haraldur Briem sóttvarnarlæknir segir að maðurinn sem smitaður er af H1N1, Svínaflensu, hafi verið að koma frá New York fyrir helgi en gert er ráð fyrir hann hafi smitast þar og óttast er að fjölskylda hans sé einnig smituð. Hann segir heilbrigðisyfirvöld hér á landi ekki bregðast hart við þessum fréttum en leggja til að viðkomandi haldi sig heima.

Þetta kom fram í viðtali við Harald í hádegisfréttum Bylgjunnar. Hann sagð einkennin vera lík þeim sem eru við hefðbundinni inflúensu. Hár hiti, vöðvaverki, hálssærindi og skyndilegur hósti. Hann biður fólk að vera vakandi fyrir þessu og þá sérstaklega fólk sem er að koma frá Mexíkó og Bandaríkjunum enda sjúkdómurinn bráðsmitandi.

Hann segir að litið sé á þetta líkt og um hefðbundna inflúensu sé að ræða. Fólk þurfi ekki að haga sér öðruvísi en ef fólk telji sig smitað er það hvatt til þess að halda sig heima og halda einhverju fyrir vitinu þegar það hóstar.

Aðspurður hvort læknar hafi verið að ávísa lyfinu Tamiflu til heilbrigðs fólks sem hefur verið að fara erlendis segir Haraldur nokkra aukningu hafa verið í því. „Það jókst snarlega þegar þessi H1N1 veira komst á skrið. Við teljum hinsvegar að nægar birgðir séu til í landinu en við eigum lyfjameðferð fyrir um þriðjung þjóðarinnar, þannig að við erum vel haldin af þessum lyfjum."

Aðspurður um líðan mannsins sem er smitaður segir hann ástand hans gott, honum sé að batna og enginn hafi orðið alvarlega veikur enn.