Orðspor Íslands hefur beðið hnekki

Orðspor Íslands á alþjóðavettvangi hefur orðið fyrir verulegu tjóni í kjölfar bankahrunsins að mati fjármálaráðherra. Ráðslag íslenskra ráðamanna og útrásarvíkinga á undanförnum misserum mun reynast Íslandi dýrt.

Aðgengi Íslands að alþjóðlegum fjármálamörkuðum lokaðist í kjölfar bankahrunsins síðastliðið haust. Má segja að traust alþjóðasamfélagsins á íslensku efnahagslífi sé í algjöru lágmarki og lýsir sér hvað best í háu skuldatryggingarálagi ríkisins.

Aðeins örfá ríki treystu sér síðasta haust til að lána íslenska ríkinu án aðkomu alþjóðagjaldeyrissjóðsins.

Steingrímur J. Sigfússon, fjármálaráðherra, segir að þrátt fyrir að Ísland eigi enn góða vini sé ljóst að orðspor Íslands hafi beðið verulega hnekki.

„Vissulega höfum við orðið fyrir áfalli og okkar orðspor og mannorð því miður er skaddað á alþjóðavettvangi. Það er dapurlegt en þannig er það. Ráðslag íslenskra ráðamanna, fjármálamanna og útrásarvíkinga á undanförnum misserum er að reynast Íslandi mjög dýrt hvað þetta snerti," segir Steingrímur.