Nefndin hlustaði á sumt en annað ekki

„Fyrst vil ég minna á að upphafleg lagasetning um Seðlabankann og allar veigamiklar breytingar á lögunum síðan hafa verið rækilega undirbúnar og um þær hefur því ætið náðst þverpólitísk samstaða á þingi," sagði Jóhannes Nordal, fyrrverandi seðlabankastjóri, í áliti sínu til viðskiptanefndar Alþingis um frumvarp ríkisstjórnarinnar um bankann. Jóhannes varð seðlabankastjóri við stofnun bankans 1961 og gegndi embætti til 1993.

Jóhannes sagði að sér virtist sérstaklega mikilvægt að fá umsögn Seðlabanka Evrópu um frumvarpið en meirihluti viðskiptanefndar hafnaði boði um slíkt. Þá sagði hann margt mæla með að tveir aðstoðarbankastjórar yrðu við bankann og varaði við að peningastefnunefnd yrði stofnuð áður en sem víðtækastra gagna um reynslu annarra þjóða af slíku fyrirkomulagi yrði aflað. Til hvorugs var tekið tillit við lagasetninguna.

Margháttaðar breytingar urðu á frumvarpinu þar til það varð að lögum. Á þriðja tug gesta komu fyrir viðskiptanefnd þingsins og henni bárust um tuttugu umsagnir.

Samtök atvinnulífsins voru harðorð í sinni umsögn og sögðu frumvarpið lagt fram án þess vandaða undirbúnings og samráðs sem mælt væri fyrir um í leiðbeiningum forsætisráðuneytisins. Þá sagði: „Í ljósi þess að peningamálastefna Seðlabankans hefur beðið skipbrot og Seðlabankinn er rúinn trausti og varð gjaldþrota er mikilvægt að allar breytingar stuðli að endurvakningu trausts á Seðlabankanum og efnahagsstefnu stjórnvalda." Því lögðu samtökin til að fram færi ítarleg úttekt á stefnu og skipulagi bankans. Þá vildu þau að bankaráð eða sérstök ráðninganefnd réði í stöðu bankastjóra en ekki forsætisráðherra.

Viðskipta- og raunvísindadeild Háskólans á Akureyri lagði til að staða seðlabankastjóra yrði auglýst á alþjóðlegum vettvangi.

Starfsmenn Viðskiptadeildar Háskólans í Reykjavík vildu að í lögunum yrði tiltekið í bráðabirgðaákvæði að peningastefnan yrði endurskoðuð. Þeir töldu jafnframt óheppilegt - í ljósi reynslunnar - að ekki væri uppsagnarákvæði um bankastjóra í lögunum.

Þá gerðu margir umsegjendur athugasemdir við hvernig standa ætti að skipan í peningastefnunefnd bankans og var í meginatriðum tekið undir sjónarmið þeirra. bjorn@frettabladid.is