Barðastrandaránið: Þriðji maðurinn handtekinn - þýfið fundið

Karlmaður fæddur 1989 var handtekinn síðdegis í dag grunaður um aðild að innbroti á Seltjarnarnesi á mánudagskvöldið þar sem karlmanni á áttræðisaldri voru veittir áverkar. Jafnframt lagði lögregla hald á þýfi úr ráninu í dag. Þetta sagði Ómar Smári Ármannsson, aðstoðaryfirlögregluþjónn hjá lögreglunni á höfuðborgarsvæðinu, í samtali við fréttastofu.

Áður hafði lögregla handsamað tvo karlmenn, fædda 1987, vegna málsins sem játað hafa aðild að málinu. Þeir sitja nú í gæsluvarðahaldi. Að sögn Ómars Smára hefur ekki verið tekin ákvörðun um það hvort að krafist verður gæsluvarðahalds yfir manninum sem handtekinn var í dag.

Þegar húsráðandi við Barðaströnd á Seltjarnarnesi kom heim rétt fyrir klukkan átta í gærkvöld heyrði hann umgang á efri hæð hússins. Stuttu síðar mætti hann manni sem sló hann í andlitið, batt hann á höndum og fótum með límbandi.

Mennirnir, sem voru tveir, fóru síðan ránshendi um húsið og tóku meðal annars um 60 armbandsúr, 70-90 armbandskeðjur og fjóra karlmannsgullhringi.

Húsráðandanum tókst eftir nokkurn tíma að losa sig og hafði samband við lögreglu. Hann hafði fengið áverka í andlit og var fluttur á slysadeild. Maðurinn sagði í samtali við fréttastofu þakka fyrir að vera á lífi en árásarmennirnir hótuðu honum öllu illu, meðal annars að sprauta piparúða í augu hans.