Krefjast þess að meirihlutinn axli ábyrgð

Vinstri Græn í Kópavogi sendu frá sér yfirlýsingu fyrir stundu varðandi skýrslu Deloitte um viðskipti Frjálsrar miðlunar ehf við Kópavogsbæ. Þar segir að skýrslan sýni að reglur hafi verið brotnar og er allri ábyrgð vísað á bæjarstjórnarmeirihluta Sjálfstæðisflokks og Framsóknar.

„Ljóst er að undir stjórn Gunnars I Birgissonar bæjarstjóra hafa verið teknar ákvarðanir um viðskipti við Frjálsa miðlun án undangenginna útboða og án þess að venjur um slík viðskipti væru virtar. Reikningar fyrirtækisins eru ónákvæmir, og á köflum ómögulegt að gera sér grein fyrir hvaða þjónusta er keypt eins og fram kemur í skýrslunni. Sú aðferð sem notuð er að dreifa reikningum á mismunandi bókhaldslykla virðist skýr tilraun til að fela að um óeðlileg viðskipti sé að ræða. Ábyrgð á þeim verknaði hlýtur að hvíla hjá bæjarstjóra. Siðareglur bæjarins, sem allir bæjarfulltrúar hafa staðfest með undirskrift sinni fyrir fáeinum dögum, hafa verið þverbrotnar.

Vinstri græn krefjast þess að bæjarstjórinn, sem og meirihluti Sjálfstæðisflokks og Framsóknarflokks í bæjarstjórn Kópavogs axli ábyrgð vegna málsins. Bæjarstjórinn hlýtur að skoða stöðu sína í ljósi skýrslunnar og þeirra ásakana um brot sem þar koma fram. Vinstri græn telja eðlilegast að bæjarstjórinn víki," segir í yfirlýsingunni.