Hagfræðingur Seðlabankans hyggst kæra mótmælanda

„Hann var að lemja bílinn með hnefa og kylfu," segir hagfræðingurinn Ólafur Klemensson, en mótmælandi lamdi í bílinn hans og dældaði að sögn Ólafs þegar hann var á leið til vinnu í Seðlabankanum í morgun. Aðspurður segist Ólafur ætla að kæra mótmælandann fyrir að hafa unnið skemmdarverk á grárri Nissan bifreið sem hann ekur um á.

„Það sást vel á honum, það var beygla á skottlokinu," segir Ólafur en mótmælandinn, sem heitir Hermann Valsson, sakar Ólaf um að hafa ekið á sig á vef dv.is. Þar segist Hermann vera slæmur í öðru hnéinu og lærinu. Að auki segist hann hafa henst til hliðar við meinta ákeyrslu og þar með hafi höndin slengst til í bílinn.

Ólafur hefur aðra sögu að segja, sakar Hermann um að hafa lamið í bílinn og skemmt vísvitandi.

„Þetta er bara fyrirsláttur," segir ÓIafur spurður út í ásakanir Hermanns og sjálfur furðar Ólafur sig á því að mótmælandinn hafi komið undir nafni, nú ætli hann að kæra hann fyrir skemmdarverk á bílnum.