Þrír vilja fyrsta sætið hjá Framsókn

Þrír sækjast eftir fyrsta sætinu á framboðslista Framsóknarflokksins í Norðvesturkjördæmi í næstu þingkosningum. Friðrik Jónsson, sérfræðingur í alþjóðasamskiptum og formaður Framsóknarfélagsins á Akranesi, sækist eftir því að leiða listann. Áður höfðu Guðmundur Steingrímsson og Gunnar Bargi Sveinsson, sveitarstjórnarmaður í Skagafirði, líst yfir að þeir stefna á fyrsta sætið. Magnús Stefánsson, eini þingmaður flokksins í kjördæminu, tilkynnti nýverið að hann hyggst ekki sækjast eftir endurkjöri.

„Ég sækist eftir að leiða lista Framsóknarflokksins í Norðvesturkjördæmi í komandi alþingiskosningum. Ég býð fram krafta mína, ekki aðeins í þágu Norðvesturkjördæmis heldur í þágu landsins alls í ljósi þess mikla uppbyggingarstarfs sem fyrir höndum er,“ segir Friðrik í tilkynningu.

Ný og gegnsæ vinnubrögð mikilvæg

Hann segir erfitt verk fyrir höndum. „Nauðsynlegt er að byggja upp traust á stjórnvöldum og stofnunum samfélagsins og kallar það á ný og gegnsæ vinnubrögð. Mikilvægt er að vel takist til. Við höfum ekki efni á mistökum. Sá kvóti er uppurinn.

Nú sem aldrei fyrr er þörf á uppbyggingu og endurreisn alþjóðlegra tengsla landsins, svo bætt verði fyrir þau mistök sem gerð voru í samskiptum við okkar helstu vinaþjóðir. Aldrei aftur megum við finna okkur á alþjóðlegu bersvæði, óstudd og óvölduð.“

Friðrik segist hafa í fjórtán hafa notið þeirrar gæfu að vinna í þjónustu þjóðarinnar innan íslenskrar stjórnsýslu, bæði innanlands og erlendis. „Það hefur gefið mér dýrmæta innsýn og fjölbreytta reynslu sem mun nýtast vel til þeirra átaksverkefna sem framundan eru.“

Starfar hjá Varnarstofnun

Í dag starfa Friðrik sem verkefnis- og sviðsstjóri hjá Varnarmálastofnun Íslands. Hann Hóf störf í utanríkisráðuneytinu í janúar 1996. Var m.a. starfsmaður sendiráðs Íslands í Washington D.C. frá 1998 til 2002 og staðgengill sendiherra við sendiráð Íslands í Kaupmannahöfn 2002 til 2006. Áður starfaði hann meðal annars hjá Vinnuveitendasambandi Íslands, í heildsölu og í Seðlabanka Íslands.

Friðrik er með BA-próf í alþjóðasamskiptum og utanríkisþjónustu, MBA-próf í alþjóðaviðskiptum og MA-próf í alþjóðasamskiptum.