Ákærður fyrir að lemja gamlan mann og ræna

Ríkissaksóknari þingfesti ákæru yfir Gytis Keplas í morgun en hann er ákærður fyrir að lemja og ræna sjötugan karlmann í slagtogi við óþekktan karlmann. Árásin átti sér stað á Laugaveginum um miðja nótt í október síðastliðnum.

Þá eiga þeir Gytis og óþekkti karlmaðurinn að hafa slegið manninn nokkrum sinnum í andlitið þannig að hann féll í jörðina. Síðan tóku þeir af honum seðlaveski, sem í voru hundrað þúsund krónur. Að auki tóku þeir farsíma mannsins ófrjálsri hendi.

Eftir að mennirnir réðust á manninn lýsti lögreglan eftir þeim í fjölmiðlum, annar þeirra náðist en talið er að hinn árásarmaðurinn hafi flúið land.

Fórnalamb árásarinnar vill rúmar tvær milljónir í miskabætur en ríkissaksóknari krefst refsingar yfir Gytis auk þess að hann beri sakakostnað.