Geta séð Björk í sturtu í Vesturbæjarlaug

Óvíst er hvort fjallagarpurinn, blaðamaðurinn og rithöfundurinn Páll Ásgeir Ásgeirsson myndi skrifa fyrir Íslendinga það sem hann lætur eftir sér í texta ætluðum erlendum túristum í bókinni The Real Iceland sem er nýútkomin.

Páll Ásgeir var um helgina staddur á Hornströndum, utan kallfæris og því ekki hægt að inna hann eftir því. En í bókinni leiðir hann túrista í allan sannleika um Íslendinga, matarsiði þeirra og venjur og frægt fólk – þjóðarsálin í spaugilegu ljósi. Þannig segir Páll til dæmis frá því í bókinni að vilji ferðamenn sjá skýrt dæmi um það þegar smekkleysi og peningar fari saman þá sé Arnarnesið staðurinn. Þá er hætt við að fjölskyldu Bjarkar bregði í brún þegar þau uppgötva hvaða mynd er dregin af þeim í bókinni.

Páll Ásgeir segir Hildi Rúnu Hauksdóttur vera sextíu ára gamlan hippa sem búi við Grettisgötu 40. „Þú ættir að knýja dyra og þykjast villtur. Nei, grín. Ekki gera það,“ skrifar Páll. Hann segir Íslendinga sem með sanni geti talist heimsfrægir rúmast í litlum japönskum bíl. Það væru þá Björk og Sigur Rós.

Páll bendir ferðamönnum á að það sé ekki til siðs að umgangast frægt fólk öðru vísi en aðra óbreytta. En þó megi bregða á þetta ráð: „Heimili Bjarkar er jörðin en lögheimili hennar er við Ægisíðu 94. Þú getur tekið leigubíl og látið taka mynd af þér fyrir utan heimili hennar. Ef þú ert algerlega forfallinn.

Uppkominn sonur Bjarkar, Sindri Eldon, sem Björk á með gítarleikaranum í Sugar Cubes – er sagður búa í húsinu stopult þó. Hann er lifandi eftirmynd móður sinnar en er þekktur fyrir stirt skap, svo ekki raska ró þeirra. Björk er oft á Íslandi og er sögð tíður gestur í Sundlaug Vestur­bæjar. Þú gætir hugsanlega séð hana í sturtu þar,“ skrifar Páll – með þeim hætti að Eiríkur Jónsson, ritstjóri Séð og heyrt, hlýtur að velta því fyrir sér hvort Pál vanti ekki starf.