Ósáttur við dóminn í Pirate Bay málinu

„Ég er ekki ánægður með þennan dóm verð ég að segja. Að þriðji aðilinn fái slíka útreið í dómsstólum," segir Svavar Lúthersson um dóm héraðsdómstóls í Stokkhólmi sem dæmdi fjóra aðstandendur skráarskiptavefjarins Pirate Bay í ársfangelsi og til að greiða 450 milljónir í skaðabætur.

Svavar stóð að skráarskiptasíðunni torrent.is, en lögbann var dæmt á þann vef í byrjun febrúar síðastliðins. Svavar segir að Pirate Bay og torrent.is séu ekki nákvæmlega eins síður en hugmyndafræðin sé sú sama, að styðja frjáls skráarskipti.

„Þeir ætla að áfrýja skilst mér þannig að maður bíður bara eftir dómi Hæstaréttar Svíþjóðar," segir Svavar. Honum finnst bótaupphæðin sem Svíarnir voru dæmdir til að greiða allt of há og að hver dagur fyrir þá í fangelsi sé einum degi of mikið.

Svavar segist sjálfur ennþá vera að gera það upp við sig hvort hann eigi að áfrýja Héraðsdómnum gegn sér til Hæstaréttar. Það verði að taka ákvörðun um það fyrir 4. maí, en ákvörðunin velti meðal annars á fjárhagsstöðunni.