Siv vill ráðast í byggingu nýs Landspítala

Það er afar brýnt að ráðist verði í hönnun og byggingu nýs Landspítala á næstunni, segir Siv Friðleifsdóttir, fulltrúi Framsóknaflokksins í heilbrigðisnefnd Alþingis. Siv lagði fram spurningu til heilbrigðisráðherra á Alþingi í dag um hvort undirbúningi að verkefninu yrði haldið áfram. Hún bíður nú skriflegs svars frá ráðherra.

„Hann var með jákvæðar yfirlýsingar fyrir kosningar og sagði að ef hann fengi einhverju um það ráðið að þá yrði haldið áfram með verkefnið. Og ég vildi vita hvort að þær yfirlýsingar stæðust ekki," segir Siv. Hún segist sjálf vera fylgjandi verkefninu vegna þess að með nýjum spítala verði væntanlega hægt að hagræða um þrjá milljarða á ári. Auk þess séu gömlu byggingarnar, sem hýsa spítalann í dag, úr sér gengnar miðað við nútímakröfur. Siv segist eiga von á því að báðir ríkisstjórnarflokkarnir séu fylgjandi þessari framkvæmd því að hún sé bæði arðsöm og atvinnuskapandi. Siv bendir þó á að vegna efnahagsástandsins verði að gæta að ítrustu hagvæmni um leið og hvergi sé slakað á gæðakröfum. Þá verði að skipta verkefninu upp í áfanga. Byrja megi á nýju húsnæði undir bráðastarfsemi.

Siv bendir á að hugmyndir hafi verið uppi um að lífeyrissjóðirnir fjármagni framkvæmdina. Sjálfri finnst henni að sú hugmynd hljóti að koma til greina. „Af því að þá myndi ríkið skulda lífeyrissjóðunum og ríkið er góður skuldari. Þannig að þeir ættu að geta treyst því að fá það greitt til baka. Þannig að mér finnst það eðlilegt og ég skil það að ráðherra skuli skoða þann möguleika," segir Siv.

Siv bendir á að fyrrverandi heilbrigðisráðherrar hafi verið mjög jákvæðir gagnvart þessari framkvæmd og hún vonist til að Ögmundur haldi áfram að undirbúa hana. „Ég veit líka að nýr forstjóri, Hulda, hefur lagt sig fram um að undirbúa bygginguna til þess að hún geti verið ódýr en samt staðist alla gæðastaðla og allar kröfur," segir Siv.