Glæpasögur Arnaldar draga að ferðamenn

Það verður örugglega ekið inn í Norðurmýrina, morðvettvang Mýrinnnar, en Ingjaldur Arnþórsson ferðaskipuleggjandi tekur á móti fyrsta sænska ferðahópnum í næsta mánuði. Hús Íslenskrar erfðagreiningar, Grafarholt, Hvalneskirkja, Þingvellir, Kleifarvatn,-þetta eru allt staðir sem útlendir aðdáendur glæpasagna Arnaldar Indriðasonar vilja sjá og upplifa.

Ingjaldur telur að kvikmyndin Mýrin hafi einnig mikið að segja. Og þetta gæti verið risamarkaður ferðamanna því bækur Arnaldar hafa selst í fimm milljónum eintaka og verið þýddar á um þrjátíu tungumál. Fyrstu skipulögðu bókaferðirnar til Íslands voru í fyrrasumar en þá komu tveir hópar Þjóðverja til landsins og það er aftur von á tveimur þýskum hópum í sumar, auk fjögurra hópa frá Svíþjóð, gagngert til að skoða söguslóðir bóka Arnaldar. Ferðaþjónustan er sem sagt farin að græða á glæpasögum.