Staða Árborgar eins og hjá öðrum sveitarfélögum

„Staðan hjá Árborg er með líkum hætti og hjá fjölmörgum öðrum sveitarfélögum á landinu," segir Ragnheiður Hergeirsdóttir bæjarstjóri Árborgar. Eyþór Arnalds, oddviti Sjálfstæðisflokksins í Árborg, sagði í samtali við Sunnlending.is í dag að fjárhagsstaða bæjarfélagsins væri verri en meirihlutinn í bæjarstjórn gerði sér grein fyrir í lok síðasta árs. Að óbreyttu stefni í að Árborg verði gjaldþrota innan tveggja ára.

„Staðan er verri en sagt hefur verið því meirihlutinn hefur ítrekað fullyrt að reksturinn gangi vel. Tap upp á 73 milljónir er fyrir fjármagnsliði og því ekkert eftir í fjárfestingar, afborganir og ekki einu sinni upp í vaxtagreiðslur," er haft eftir Eyþóri.

Ragnheiður segir að það liggi ljóst fyrir að staða sveitarfélaga sé almennt slæm. „Það skipir mjög miklu máli fyrir öll sveitarfélög hvernig málin þróast. Ekki bara fyrir Árborg, heldur fyrir öll sveitarfélög í landinu. Þetta er gríðarlega stórt verkefni og skiptir máli að sveitastjórnarfólk taki höndum saman við að búa í haginn fyrir íbúana," segir Ragnheiður.