66 sumarhúsalóðir í Grímsnesi á uppboð

Mikill samdráttur hefur orðið í sumarhúsabyggingum í uppsveitum Árnessýslu og eru nú 66 sumarhúsalóðir í grennd við Kerið í Grímsnesi, að fara á uppboð.

Gerðarbeiðandi í öllum tilvikum er Grímsnes- og Grafningshreppur, vegna vangoldinna fasteignagjalda. Uppboðið hefst hjá sýslumanni á Selfossi á mánudag, og eru eignirnar allar á hendi eins og sama fyrirtækisins, sem heitir SH Festir ehf. Fyrr í vor voru 26 lóðir á svipuðum slóðum, ásamt átta sumarhúsum á mismunandi byggingarstigum seldar á nauðungaruppboði.

Landsbankinn keypti allan pakkann, en hann hafði lánað háar upphæðir til kaupa og framkvæmda. Frá upsveitum Árnsssýslu, niður um Flóann og allt til hafs, er í ár búið að gefa út rúmlega 70 byggingaleyfi til fjósbygginga, stækkunar eða breytinga á íbúðarhúsum og útihúsum bænda, reiðhalla, geymsluhúsnæðis og sumarbústaða.

Brot af þessum leyfum eru til bygginga sumarbústaða, en á árunum 2006 og 7 voru gefin út á fjórtánda hundrað byggingarleyfi á svæðinu, þar af um helmingur til bygginga sumarbústaða, eða vel á fjórða hundrað leyfi hvort ár, svo samdrátturinn er gríðarlegur.