Gagnrýnir Olli Rehn fyrir ummæli um Ísland

Hans-Gert Pöttering, forseti Evrópuþingsins, gagnrýnir stækkunarstjóra sambandsins Olli Rehn fyrir ummæli sem hann lét falla um Ísland í breska blaðinu Guardian. Þar sagði Rehn að Íslendingar gætu gerst aðilar að Evrópusambandinu árið 2011, á sama tíma og Króatar ganga inn.

Pöttering segir hins vegar í viðtali við finnska blaðið Aamulehti að tímasetning ummæla Rehns sé slæm. „Nú er ekki rétti tíminn til þess að tala um frekari stækkun sambandsins," segir Pöttering.

Að mati Pötterings á sambandið að einbeita sér að því að fá ríkin til þess að staðfesta Lissabon sáttmálann. Ummæli Rehns gætu hinsvegar stofnað því ferli í hættu. Ekki eru allir þingmenn Evrópuþingsins á sama máli og forsetinn því finnsku þingmennirnir Ville Itälä og Anneli Jätteenmäki verja ummæli samlanda síns Rehn.

Þeir benda á að þingið hafi ekki tekið heilstæða afstöðu til frekari stækkunar. Þeir benda einnig á að forsetinn geti ekki verið að predika um málfrelsi á sama tíma og verið sé að múlbinda framkvæmdastjóra á borð við Rehn.