Telur líklegt að Evróputillaga verði samþykkt

Össur Skarphéðinsson utanríkisráðherra segist vera þess fullviss að þingsályktunartillaga um aðildarviðræður við Evrópusambandið verði samþykkt. Hann segir ótímabært að velta því fyrir sér hvort Samfylkingin eigi að slíta stjórnarsamstarfi við Vinstri græna verði tillagan felld.

Samfylkingin setti Evrópumálin á oddinn og gerði þau að sína helsta baráttumáli fyrir síðustu alþingiskosningar.

Vinstri grænir voru og eru hins vegar á móti aðild og urðu ríkisstjórnarflokkarnir að lokum sammála um að vísa málinu til Alþingis í stað þess að leysa það sín á milli.

Tillagan verður væntanlega lögð fram á Alþingi í vikunni.

Nokkrir þingmenn vinstri grænna hafa þegar lýst því yfir að þeir muni ekki greiða atkvæði með tilögunni. Forystumenn Framsóknar- og sjálfstæðisflokks hafa lýst yfir efasemdum með tillögudrög og því fullkomlega óvíst að málið verði samþykkt á Alþingi.

Össur Skarphéðinsson segist vona að þingmenn taki afstöðu til málsins út frá sinni eigin sannfæringu.

„Ég hef trú á því að menn taki hagsmuni þjóðarinnar og setji þá í fyrirrúm en láti sig ekki falla í einhverjar flokkspólitískar karpgrafir," segir Össur.

Efnhagsstefna Samfylkingarinnar byggir að miklu leyti á aðild að Evrópusambandinu og upptöku Evru. Össur segir ótímabært að velta því fyrir sér hvort Samfylkingin eigi að slíta stjórnarsamstarfinu verði tillagan felld.