Ómar Stefánsson: Ég er búinn að taka ákvörðun

„Ég er búinn að taka ákvörðun um það sem mér finnst," segir Ómar Stefánsson, bæjarfulltrúi Framsóknarflokksins en hann mun hitta fulltrúaráð flokksins í kvöld og ræða við þá um þá stöðu sem er kominn vegna skýrslu Deloiette vegna viðskipta Kópavogsbæjar við fyrirtæki dóttur Gunnars Birgissonar.

Í Fréttablaðinu í morgun kemur fram að Ómar hafi hitt Gunnar Birgisson á fundi í gær og þar hafi hann tjáð honum þá skoðun sína að Gunnar ætti að víkja sem bæjarstjóri. Hann gerði ekki þá kröfu að Gunnar segði af sér sem bæjarfulltrúi.

„Ég ætla ekki að staðfesta þetta," svarar Ómar þegar hann er spurður út í frétt Fréttablaðsins.

Ómar segist ekki ætla að tjá sig efnislega um málið fyrr en hann hittir fulltrúaráðið í kvöld.

„Ég mun kláralega gera þeim grein fyrir minni afstöðu," segir hann ákveðinn að lokum.