Engar breytingar fyrirhugaðar á losunarheimildum

Formaður samninganefndar Íslands um loftslagsmál segir að engar breytingar séu framundan á losunarheimildum íslenskra stóriðjufyrirtækja fram til ársins 2012. Árið 2013 muni íslensk stóriðja hins vegar fá allar sínar heimildir í gegnum evrópska kerfið og standa jafnfætis evrópskum fyrirtækjum í orkufrekum iðnaði.

Umhverfisráðherra lýsti því yfir í vikunni að ekki yrði sótt um frekari undanþágur frá Kyoto bókuninni. Vigdís Hauksdóttir, þingmaður Framsóknarflokks, sagði á Alþingi í vikunni að ráðherrann væri með þessu að afsala sér fyrir hönd þjóðarinnar verðmætum loftslagskvóta.

Þórir Ibsen, formaður samninganefndar Íslands um loftslagsmál, segir að engar breytingar séu framundan á losunarheimildum íslenskra stóriðjufyrirtækja fram til ársins 2012, þegar svokölluðu fyrsta skuldbindingartímabili Kyoto bókunarinnar lýkur. Á því tímabili fylgi íslensk stóriðjufyrirtæki þeim reglum sem séu í gildi í dag.

„Það verða hinsvegar breytingar 2013 því þá mun íslensk stóriðja falla undir evrópskar reglur og á allar sínar heimildir í gegnum það kerfi," segir Þórir.

Þá muni íslensk fyrirtæki standa jafnfætis sambærilegum evrópskum fyrirtækjum í stóriðju eða orkufrekum iðnaði. „Gert er ráð fyrir að þau fyrirtæki fái í fyrstu að megninu til allar sínar þarf á losunarheimildum fríar en síðan mun draga úr þeim smátt og smátt til 2027."

Þórir segir að breytingarnar felast í því að íslensku stóriðjufyrirtækin muni ekki fá sinn kvóta í gegnum Ísland heldur sem fyrirtæki. Alveg eins og önnur evrópsk fyrirtæki. „Fyrirtæki sem starfa á evrópskum markaði fá útdeilt árlega ákveðnum fjölda á losunarheimildum."

Sú ákvörðun verður miðuð við gæðaviðmið, hversu vel fyrirtæki standa sig umhverfislega. Þórir segir að íslensk fyrirtæki séu í hópi bestu fyrirtækja í Evrópu hvað varðar umhverfisstaðal.

Þórir segir að ekkert í sínu umboði miði að því að valda tjóni fyrir íslensk fyrirtæki eða fjárhagslegu tjóni fyrir samfélagið. Þvert á móti sé það markmiðið að íslensk fyrirtæki standi jafnfætis öðrum evrópskum fyrirtækjum á evrópskum markaði.