Óánægður með ákvörðun Svandísar

Yfirlýsingar umhverfisráðherra um að nýta ekki undanþágur frá Kyotobókuninni eru vonbrigði að mati Illuga Gunnarssonar, þingmanns Sjálfstæðisflokksins. Miklir fjárhagslegir hagsmunir séu í húfi.

Íslendingar fengu undanþágu frá Kyoto bókuninni árið 1997 til að auka útstreymi gróðurhúsalofttegunda á tímabilinu 2008 til 2012 um allt að 1,6 milljón tonn.

Svandís Svavarsdóttir, umhverfisráðherra, lýsti því yfir á umhverfisþingi í gær að ekki yrði sótt um frekari undanþágur frá Kyoto bókuninni. Svandís sagði að Ísland ætti ekki að mæta með sérkröfur eða beiðni um undanþágur á væntanlega loftslagsráðstefnu í Kaupmannahöfn, sem haldin verður í desember. Með þessari afstöðu hefur umhverfisráðherra verið sökuð um að kasta verðmætum á glæ og setja vinnumarkaðinn í uppnám.

Illugi Gunnarsson, þingmaður Sjálfstæðisflokksins, segir að yfirlýsingu Svandísar ekki koma á óvart.

„Um leið eru þetta heilmikil vonbrigði. Það eru miklir hagsmunir í húfi fyrir Ísland og það átti að sækja þá hagsmuni að fullu afli. Undanþágan á sínum tíma var staðfesting á því að við Íslendingar hefðum náð miklum árangri í umhverfismálum og sérstaklega þegar kemur að nýtingu á hreinni orku," segir Illugi.