Vill að Samkeppniseftirlitið kanni hækkanir olíufélaga í lok maí

Olíufélögin hafa í tæpar tvær vikur ofrukkað viðskiptavini sína um milljónir króna. Þau lækkuðu verðið í dag og ætla að minnsta kosti tvö þeirra að endurgreiða það sem var oftekið. Framkvæmdastjóri FÍB ætlar óska eftir því að Samkeppniseftirlitið rannsaki hækkanir olíufélaganna í lok maí.

Alþingi samþykkti í lok maí að hækka bensíngjaldið um tíu krónur á lítrann. Olíufélögin brugðust hratt við og hækkuðu strax verðið hjá sér. Svo virðist sem að þau hafi hækkað of fljótt. Þannig tilkynntu stóru olíufélögin í dag að um mistök hafi verið að ræða þegar þau gripu til hækkana og lækkuðu þau bensínlítrann um tólf og hálfa krónu hjá sér. Forstjóri Skeljungs segir fyrirtækið hafa haft þann skilning að hækkunin legðist á þær birgðir sem komnar voru til landsins en ekki var búið að tollafgreiða en komið hafi í ljós að svo var ekki.

Framkvæmdastjóri Félags Íslenskra bifreiðaeigenda ætlar að óska eftir því að Samkeppniseftirlitið kanni hækkanir olíufélaganna í byrjun maí og telur hann þær óeðlilegar. Lækkanirnar í dag gilda aðeins um bensín en ekki dísel. Forstjóri N1eins segir ofrukkunina hjá þeim nema níu milljónum króna og að farin verði sú leið að gefa þá upphæð til góðgerðarmála. Skeljungur býður viðskiptavinum sínum hins vegar að koma og fá endurgreitt.