Árni Páll: Sjálfstæðisflokkur eins og bandalag skæruliðahópa

Árni Páll Árnason, þingmaður Samfylkingarinnar, fór hörðum orðum um fyrrverandi samstarfsflokk Samfylkingarinnar í ríkisstjórn í viðtali á RÚV. Þar sagði hann meðal annars að það hafi verið eins og að eiga við bandalag skæruliðahópa en ekki stjórnmálaflokk síðustu daga og vikur.

Hann nefndi samstarfsörðugleika á borð við Evrópumálið til dæmis um það og einnig aðkomu Alþjóðagjaldeyrissjóðsins í upphafi sem forysta Sjálfstæðisflokksins hefði róið að öllum árum að koma í veg fyrir í upphafi.

Árni sagði að svo virtist vera að aðalatriði Sjálfstæðisflokksins sé það að viðhalda því sem hann kallaði forréttindaklíku flokksins í stað þess að stjórna landinu.

„Við vorum ekki tilbúin til þess að sitja undir duglítilli verkstjórn," sagði Árni. Honum líst einnig illa á hugmyndir um þjóðstjórn og sagði að ekkert betra væri að fleiri væru um aðgerðarleysið.