Ekki búið að semja um stól forseta Alþingis

Sigmundur Davíð Gunnlaugsson er nýkominn af fundi með forseta Íslands á Bessastöðum. Hann sagðist hafa upplýst forseta um það hvernig flokkurinn mæti stöðuna og ítrekaði að flokkurinn myndi verja minnihlutastjórn Samfylkingar og Vinstri grænna gegn falli gegn vissum skilyrðum sem snúa að heimilunum í landinu og atvinnulífinu. Hann sagði flokkinn einnig vilja sjá breytingar á stjórnarskrá hjá nýrri ríkisstjórn en myndi ekki skipta sér af niðurröðun í ráðherraembætti.

Hann sagðist þó vilja sjá stjórnarsáttmála flokkanna áður en Framsóknarmenn lýstu því fromlega yfir að þeir styddu samstarfið.

Aðspurður hvort búið væri að semja um að Framsókn fengi stól forseta Alþingis sagði Sigmundur svo ekki vera. Hann sagði það hinsvegar góða hugmynd hjá fréttamanni. Hann sagði að minnihlutastjórn Vg og Samfylkingar væri líklegri en þjóðstjórn.

Hann sagðist einnig reikna með því að fara heima að sofa að loknum þessum fundi og því ætluðu Framsóknarmenn ekki að funda í kvöld.

Nú situr Gujón Arnar Kristjánsson formaður Frjálslynda á fundi með forseta. Magnús Þór Hafsteinsson varaformaður flokksins er með í för en hann reyndist eftir allt saman einungis vera bílstjóri Guðjóns og bíður frammi á meðan þeir funda.