Útilokar þjóðstjórn undir forystu Sjálfstæðisflokksins

Ingibjörg Sólrún Gísladóttir var að koma af fundi með forseta Íslands á Bessastöðum. Eftir fundinn ræddi hún við fréttamenn og sagðist hafa greint forseta frá því sem gerst hafi í gær og í dag. Í máli hennar kom fram að hún útilokar þjóðstjórn undir forystu Sjálfstæðisflokksins.

Ingibjörg sagði að Samfylkingin hefði beðið lengi eftir því að Sjálfstæðisflokkurinn gerði ákveðnar breytingar og nefndi þar tiltekt í yfirstjórn Seðlabankans til þess að öðlast traust og trú.

Hún útilokaði ekki minnihlutastjórn Samfylkingarinnar og Vinstri grænna með stuðningi Framsóknarflokksins.

Hún sagði ekki rétt hjá Geir H. Haarde forsætisráðherra að Samfylkingin væri í tætlum en eðlilegt væri að hann beindi sjónum fólks frá sínum flokki og yfir á Samfylkinguna.

„Við höfum beðið lengi eftir Sjálfstæðisflokknum og nú er hann búinn að fresta landsfundi sínum þar sem ræða átti mikilvæg mál tengd Evrópusambandinu. Flokkurinn hefur ekki verið fær um að gera þessar breytingar og ég held að menn ættu að líta sér nær þegar þeir tala með þessum hætti."

Ingibjörg sagðist ekki telja útilokað að á þessum tíma annað kvöld væri búið að mynda nýja Ríkisstjórn. Hún sagðist ekki telja neinn ávinning í því að fjölga í Ríkisstjórn með þjóðstjórn þar sem Sjálfstæðiflokkur væri í forystu.

Hún sagðist ítreka tilboð sitt þar sem hún viki til hliðar og Jóhanna Sigurðardóttir myndi leiða komandi stjórn. Hún sagðist treysta Jóhönnu allra kvenna best til þess að gera það.