Sjálfstæðisflokkurinn er í gíslingu Davíðs Oddssonar

Ágúst Ólafur Ágústsson varaformaður Samfylkingarinnar segir að Sjálfstæðisflokkurinn sé í gíslingu Davíðs Oddssonar seðlabankastjóra. Hann segir út í hött að Samfylkingin sé í tætlum. Hann vonast til þess að Samfylking og Vinstri grænir nái að mynda ríkisstjórn með stuðningi Framsóknar.

Ágúst Ólafur var gestur í Kastljósi Ríkissjónvarpsins í kvöld. Þar sagði hann einnig að Sjálfstæðisflokkurinn væri í krísu þar sem hann væri klofinn í herðar niður í evrópumálum og ljóst væri að formannsslagur yrði á komandi landsfundi. Einnig mætti fólk ekki gleyma því hvernig flokkurinn hefur hagað sér í borginni.

Ágúst sagði að Sjálfstæðisflokkurinn hefði borið ábyrgð á þeim aðgerðum sem snéru að fyrirtækjunum í landinu. Þar væru þrjú af tólf atriðum komin í gegn en Samfylkingin hefði borið ábyrgð á því sem snéri að heimilunum. Þar væru níu af tíu atriðum komin í gegn.

Sína stöðu innan flokksins sagði hann ágæta og hann væri ekki fúll þó honum hefði ekki verið treyst fyrir stærri embættum innan flokksins. „Ég hef aldrei gert neina kröfu fyrir mig, það er bara tittilingaskítur í þessu stóra samhengi. Framundan er 100 daga Ríkisstjórn vonandi með Vinstri grænum," sagði Ágúst Ólafur.

Hann sagði forgangsatriði nýrrar Ríkisstjórnar að taka til í Seðlabanka Íslands.