Ólátabelgirnir á Upton Park eiga yfir höfði sér lífstíðarbann

„Þessi hegðun verður ekki liðin. Þetta er forkastanlegt og við þurfum að rannsaka málið vel áður en hæfileg refsing verður tekin upp," segir Adrian Bevington, stjórnarmaður enska knattspyrnusambandsins, í samtali við Sky Sports fréttastofuna um ólæti innan vallar sem utan þegar erkifjendurnir West Ham og Millwall áttust við í 2. umferð enska deildarbikarsins.

Skipulögð slagsmál áttu sér stað fyrir utan Upton Park-leikvanginn áður en leikurinn hófst og þar var meðal annars einn maður stunginn með hnífi og eftir að leikurinn hófst ruddust sauðdrukknir ólátabelgir inn á leikvöllinn þannig að leikurinn tafðist um dágóða stund.

„Það var vitað fyrir leikinn að öryggismál þyrftu að vera í lagi og við þurfum að ganga úr skugga um að þau hafi verið það áður en við aðhöfumst eitthvað í málinu. Það er annars erfitt að skella sökinni á félögin því þau hafa eflaust gert allt sem í þeirra valdi stóð til þess að koma í veg fyrir ólæti.

Mikilvægast er að bera kennsl á þá einstaklinga sem urðu valdir af ólátunum og taka þá úr umferð og sjá til þess að þeir fái ekki aðgang á fleiri fótboltaleiki í framtíðinni," segir Bevington sem telur þó ekki að ólætin muni skaða möguleika Englands á að halda lokakeppni HM 2018 eins og stefnan er sett á.