Þarf að semja aftur vegna Icesave

Fyrirvarar við Icesave samkomulagið hafa það í för með sér að semja þarf við Breta og Hollendinga upp á nýtt. Þetta er mat lagaprófessors við Háskóla Íslands.

Frumvarp um ríkisábyrgð vegna Icesave samkomulagsins var afgreitt út úr fjárlaganefnd Alþingis um helgina. Nefndin setti fyrirvara við veitingu ríkisábyrgðar svo sem að greiðslur miðist við hagvöxt í stað landframleiðslu og að dregið verði úr gengisáhættu.

Stefán Már Stefánsson, lagaprófessor við Háskóla Íslands, er einn þeirra sem gagnrýnt hefur Icesave samkomulagið. Hann segir fyrirvarana mikils virði en hann hefði þó viljað sjá þá ganga lengra. Stefán segir það sitt mat að fyrirvararnir séu þess eðlis að málið lendi í samningaviðræðum á ný.