Atli: Alþingi var notað sem fangelsi og lögreglustöð

Þinghúsið var notað sem fangelsi og lögreglustöð á meðan á mótmælunum stóð í gær, að mati Atla Gíslasonar þingsmanns Vinstri grænna. Hann krefst þess að allsherjarnefnd komi saman og ræði atburði gærdagsins.

,,Þinghúsið var sneisafullt af lögreglumönnum og það var ekki þverfóta fyrir þeim," segir Atli sem telur þörf á að settar verði reglur um það hvernig málum er háttað þegar fjölmennt lið lögreglumanna er í þinghúsinu.

Stefán og Hörður verði kallaðir á fundinn

Atli vill að málið verði rætt opinskátt í nefndinni og að þingmenn verði upplýstir um atburðarásina. Hann vill að Geir Jón Þórisson yfirlögregluþjónn, Stefán Eiríksson lögreglustjóri á höfuðborgarsvæðinu, Sturla Böðvarsson forseti Alþingis, Helgi Bernódusson skrifstofustjóri Alþingis og Hörður Torfasson, talsmaður Radda fólksins verði kallaðir á fundinn.

Ekki borist svar frá Birgi

Atla hafði ekki borist svar frá Birgi Ármannssyni, formanni allsherjarnefndar, við beiðninni þegar fréttastofa ræddi við hann fyrir stundu. Samkvæmt dagskrá nefndarinnar er ráðgert að hún komi næst saman á miðvikudaginn eftir viku.

Fólk er óánægt

Atli segist hafa verið við þinghúsið í gærkvöldi og rætt við fjölda fólks um ástandið. ,,Fólk er afskaplega ósátt."