Tilboð um minnihlutastjórn stendur ennþá

Við erum mjög miður okkar yfir tíðindum af Geir og mjög brugðið, segir Sigmundur Davíð Gunnlaugsson, formaður Framsóknarflokksins. Hann var nýkominn af auka þingflokksfundi þar sem tíðindi dagsins voru rædd þegar Fréttastofa náði af honum tali. Geir Haarde tilkynnti í hádeginu að hann væri með krabbamein í vélinda og hann hygðist ekki gefa kost á sér sem formaður Sjálfstæðisflokksins á næsta landsfundi hans. „Við sendum honum okkar bestu óskir um skjótan og góðan bata," segir Sigmundur. Sigmundur segir að framsóknarmenn fagni því að það skuli nást fram að af kosningum skuli verða.

„Hins vegar held eg að það verði mjög erfitt fyrir þessa ríkisstjórn að starfa áfram í ljósi þess sem sagt hefur verið undanfarna daga og stöðunnar í stjórnarflokkunum. En tilboð Framsóknarflokksins um að verja minnihlutastjórn Samfylkingar og Vinstri grænna stendur ennþá, jafnvel þó að kjördagur verði annar en við miðuðum við," segir Sigmundur Davíð.

Sigmundur Davíð sagðist vilja senda Geir Haarde og fjölskyldu hans sínar bestu óskir.