12 þúsund mótmæla Icesave samningum á Facebook

Tæplega tólf þúsund manns hafa skráð sig í hóp á samskiptavefnum Facebook gegn Icesave samkomulaginu en hópurinn var stofnaður á föstudag. Steingrímur J. Sigfússon, fjármálaráðherra, mun flytja munnlega skýrslu um samkomulagið á Alþingi í dag en á sama tíma hefur verið boðað til mótmælastöðu við Alþingishúsið.

Mikil óvissa ríkir um það hversu mikið kemur til með að falla á ríkissjóð þegar fyrstu afborganir af láninu koma til greiðslu eftir sjö ár. Talað hefur verið um upphæðir á bilinu 200 til 350 milljarðar króna og er þá tekið tillit til vaxta en ekki verðbólgu og gengisbreytinga. Upphæðina á að greiða upp á átta árum.

Pétur Blöndal, þingmaður Sjálfstæðisflokks, segir augljóst að Íslendingar hafi verið þvingaðir til skrifa undir þetta samkomulag. Vextirnir séu alltof háir og áhættan of mikil.

Boðað hefur verið til mótmælastöðu fyrir fram Alþingishúsið klukkan þrjú í dag á sama tíma og Steingrímur J. Sigfússon, fjármálaráðherra, flytur munnlega skýrslu um samkomulagið.

Ljóst er að mikil óánægja er með samninginn og höfðu um 12 þúsund manns skráð sig í hóp gegn samninginum á samskiptavefnum Facebook nú rétt fyrir hádegi - en hópurinn var stofnaður fyrir aðeins þremur dögum.