Rólyndisyfirbragð á mótmælum gærkvöldsins

Á þriðja hundrað mótmælendur stóðu enn vaktina við Alþingishúsið um miðnætti, þrátt fyrir vonskuveður, en mótmælaaðgerðum lauk upp úr klukkan eitt.

Allt annað yfirbragð var á mótmælunum í gærkvöldi en í fyrrakvöld og voru engin spellvirki unnin utan hvað drukkinn maður braut rúðu í Alþingishúsinu þegar hann átti þar leið fram hjá, en hann er ekki talinn tengjast neinum hópi mótmælenda. Mótmælendur með gula borða tóku sér stöðu framan við Alþingishúsið þar sem lögreglumenn hafa staðið vakt, þannig að lögreglumenn dógu sig að mestu í hlé og voru ekki óeirðabúnir.

Ekki kom til neinna vandræða. Fjölmennur borgarafundur var haldinn í Brekkuskóla á Akureyri, en að örðu leyti voru ekki mótmælaaðgerðir þar, enda var veður vont.