Bíll valt á Snæfellsnesvegi í nótt

Umferðaróhapp varð á Snæfellsnesvegi vestan Borgarness klukkan rúmlega tvö í nótt þegar fólksbíll valt. Tvennt var í bílnum sem slasaðist ekki mikið en fólkið var flutt á næstu heilsugæslu til aðhlynningar, að sögn lögreglunnar í Borgarnesi. Bifreiðin er ónýt en svo virðist sem að ökumaðurinn hafi misst stjórn á henni með fyrrgreindum afleiðingum.

Nóttin var erilsöm en tíðindalítil hjá lögreglunni á höfuðborgarsvæðinu. Lögregla stöðvaði för fjögurra ökumanna sem grunaðir voru um akstur undir áhrifum áfengis og þá var tilkynnt um tvö innbrot í bíla. Í báðum tilfellum var græjum og öðru lauslegu stolið.

Að öðru leyti virðist nóttin víðast hvar hafa verið tíðindalítil. Lögreglan á Húsavík handtók þó einn ökumann grunaðan um fíkniefnaakstur.

Á Selfossi fór fram fjölmennt unglingaball sem fór einkar vel fram og þurfti lögregla að hafa lítil sem engin afskipti af ungmennunum.