Gefur sér góðan tíma í að skoða hvalveiðiheimildir

Steingrímur J. Sigfússon sjávarútvegsráðherra sagði á fjölmennum borgarafundi um hvalveiðar, á Akranesi í gærkvöldi, að hann ætlaði að taka sér góðan tíma til að skoða nýútgefnar hvalveiðiheimildir frá sjónarhóli allra hagsmunahópa, sem málið varðar.

Steingrímur hefur lýst andstöðu við heimildirnar, sem Einar K. Guðfinnssson gaf út, rétt áður en hann lét af ráðherradómi nýverið. Hvalveiðimenn og aðrir sem hagsmuni hafa af veiðunum, segja að öll óvissa tefji undirbúning að veiðunum, en hópar innan ferðaþjónustunnar og þá sérstaklega samtök hvalaskoðunarfyrirtækja, telja að hvalveiðar í atvinnuskyni kunni að skaða hagsmuni ferðaþjónustunnar.

Þá fari hvalaskoðun og hvalveiðar alls ekki saman og hvalaskoðun sé ótvírætt atvinnuskapandi, því umþaðbil 200 manns vinni við hana. Fylgjendur hvalveiða á fundinum bentu á að miðað við núverandi ástand í efnahagsmálum þjóðarinnar mætti einskis ófreistað til að afla tekna og gjaldeyris, enda yrðu hvalveiðarnar innan ramma sjálfbærra veiða.