Flýðu þegar Vinnumálastofnun mætti

Tveir menn lögðu á flótta þegar vinnueftirlitsmenn á vegum stéttarfélaganna og Vinnumálastofnunar mættu á staðinn í gær. Þetta kemur fram á vef Vinnumálastofnunar.

Mennirnir voru að störfum í húsi sem verið er að breyta við Hverfisgötu. Þegar vinnueftirlitsmenn komu á staðinn lögðu þeir á flótta en stuttu síðar sást til þeirra á Arnarhóli.

Þegar eftirlitsmenn ætluðu að hafa tal af þeim á Arnarhóli tóku þeir á sprett og hurfu sjónum. Í ljós kom að mennirnir hafa verið á atvinnuleysisbótum og mun Vinnumálastofnun í framhaldinu kanna hvort þeir hafi verið í vinnu á sama tíma.

Í venjubundnu eftirliti sem nokkur stéttarfélög ásamt Vinnumálastofnun hafa framkvæmt undanfarin ár hefur aðaláhersla verið lögð á eftirlit með erlendum starfsmönnum sem hafa starfa hér á landi, að þeir hafi atvinnuleyfi og starfi hér löglega, segir á vef Vinnumálastofnunnar. Undanfarið hefur eftirlitið þróast með tilliti til breyttra aðstæðna og farið yfir í að fylgjast með því hvort starfsmenn séu að greiða lögbundin gjöld og launatengd. Þá hefur einnig verið athugað hvort starfsmenn séu á atvinnuleysisbótum og í vinnu á sama tíma.