Harma breytingar á heilsugæslu

Stjórn Fagdeildar heilsugæsluhjúkrunarfræðinga harmar þá ákvörðun yfirstjórnar Heilsugæslu höfuðborgarsvæðisins að fækka stöðugildum hjúkrunarfræðinga um 12, sem og að gjörbylta starfsemi Miðstöðvar heilsuverndar barna og Miðstöðvar mæðraverndar sem báðar verða lagðar niður.

,,Ljóst er að nauðsynlegt er að spara í ríkisrekstri, og eru hjúkrunarfræðingar starfandi hjá HH tilbúnir að taka þátt í niðurskurðaraðgerðum. Hins vegar þarf að skoða út frá faglegu sjónarmiði hvar best er að bera niður," segir í ályktun stjórnarinnar.

Stjórn Fagdeildar heilsugæsluhjúkrunarfræðinga segir hjúkrunarfræðinga í heilsugæslu sinna mikilvægri grunnþjónustu í heilbrigðiskerfinu. ,,Þeir hitta svo til alla nýorðna foreldra og öll skólabörn og eru því í ákjósanlegri stöðu til að finna og skima fyrir vanda sem getur orðið langvarandi heilbrigðisvandi ef ekki er brugðist við."  

Með fyrrgreindum breytingum telur stjórnin að mikilvægt starf í ung- og smábarnavernd, skólaheilsugæslu og mæðravernd skerðast og öflugu forvarnar- og heilsuverndarstarfi sé þar með stefnt í hættu. Fagdeild heilsugæsluhjúkrunarfræðinga óskar því eftir því að ný ríkisstjórn endurskoði þessa ákvörðun.