Afturkallar ákvörðun um innritunargjöld á sjúkrahús

Ögmundur Jónasson, nýskipaður heilbrigðisráðherra, hefur ákveðið að afturkalla ákvörðun fyrrverandi ráðherra um innritunargjöld á sjúkrahús. Þá kemur einnig til greina að falla frá fyrri ákvörðun um endurskipulagningu Sankti Jósefsspítala.

Guðlaugur Þór Þórðarson, fyrrverandi heilbrigðisráðherra, réðst í umdeildar breytingar á heilbrigðiskerfinu nú rétt eftir áramót. Vinstri grænir sem þá voru í stjórnarandstöðu gagnrýndu breytingarnar harðlega. Nú er spurning hvort fyrsta verk hins nýja heilbrigðisráðherra verði að ógilda þessar ákvarðanir.

„Já það verður gert. varðandi innrintunargjöldin á sjúkrahúsin þá hefur þegar verið ákveðið að afturkalla þau. og ég ekki síst gagnrýndi þá ákvörðun mjög eindregið á alþingi og það er mitt fyrsta verk að afturkalla þau," segir Ögmundur.

Til stóð að að gera umtalsverðar breytinar á rekstri St. Jósefsspítala í Hafnarfirði. Ögmundur útilokar ekki að fallið verði frá þeim breytingum. Ögmundur segir að málefni St. Jósefsspítala verði teknar til skoðunar. Hann hafi þegar óskað eftir fundi með bæjarstjóranum í Hafnarfirði og muni hitta hann í vikunni.

Guðlaugur Þ. Þórðarson, fyrrverandi heilbrigðisráðherra, segir alveg ljóst að stjórnvöld þurfi að skera niður í heilbrigðiskerfinu. Markmiðið sé að halda uppi þjónustustiginu. Séu menn með einhverjar aðrar leiðir í því þá er það bara ágætt. Hann vari hins vegar við því að menn hviki frá þessum markmiðum.

Ögmundur segir að framundan sé mikill niðurskurður. Vanhugsaðar ráðstafanir séu hins vegar dýrustu ráðstafanir þegar uppi sé staðið.