Þingmenn VG skipta með sér verkum

Þingflokkur Vinstri grænna kemur saman í fyrsta sinn eftir stjórnarskiptin klukkan 18 í kvöld og skiptir með sér verkum. Fyrir liggur að kjörinn verður nýr þingflokksformaður. Ögmundur Jónasson sem gegnt hefur embættinu allt frá því að fulltrúar flokksins tóku fyrst sæti á Alþingi árið 1999 lætur af störfum í kjölfar þess að hann var skipaður heilbrigðisráðherra í gær.

Umtalverðar breytingar verða gerðar á nefndarskipan Alþingis og nýir formenn fastanefnda kjörnir þegar þing kemur saman á morgun. Sjálfstæðismenn hafa veitt sex þingnefndum forystu undanfarin ár en láta nú af störfum. Nefndirnar eru; utanríkismálanefnd, allsherjarnefnd, efnahags- og skattanefnd, heilbrigðisnefnd, menntamálanefnd og sjávarútvegs- og landbúnaðarnefnd.

Þingmenn Vinstri grænna eru níu talsins. Fjórir þeirra voru skipaðir ráðherrar í gær og því mun á næstunni mikið mæða á þingmönnunum Atla Gíslasyni, Álfheiði Ingadóttur, Árna Þór Sigurðssyni, Jóni Bjarnasyni og Þuríði Backman.