Ólýðræðisleg skipun ráðherra

„Þarna er verið að styrkja sérfræðiþekkingu innan ríkisstjórnarinnar, en þessar skipanir eru ekki mjög lýðræðislegar. Þessir nýju ráðherrar eru ekki kosnir til þings og hafa því ekki lýðræðislegt umboð þjóðarinnar. Maður veltir því fyrir sér hvort stjórnarflokkarnir búi ekki yfir nógu öflugu fólki á þessum sviðum til að taka þessi ráðherraembætti að sér," segir Baldur Þórhallsson stjórnmálafræðiprófessor um skipun utanþingsráðherra í nýrri ríkisstjórn sem kynnt var í gær.

Baldur segir nýju stjórnina veika. „Stjórnin hefur ekki stuðning nema 27 þingmanna. Stjórnarandstaðan hefur á að skipa 29 þingmönnum og því þarf stjórnin á stuðningi Framsóknar að halda í hverju einasta frumvarpi sem hún leggur fram. Stjórnin hefur líka afar skamman tíma til stefnu því þingið mun að öllum líkindum fara í frí nokkrum vikum fyrir kosningar hinn 25. apríl."- kg