Stjórnendur kallaðir til vitnis

Lögmenn Hafnarfjarðarbæjar ætla að kalla hluta stjórnenda Orkuveitu Reykjavíkur (OR) og Bjarna Ármannsson, fyrrverandi stjórnarformann Reykjavik Energy Invest (REI), sem vitni í dómsmáli vegna sölu á hlut í Hitaveitu Suðurnesja (HS).

Til stendur að kalla fyrir dóm níu vitni sem bera eiga um samningsgerð milli Hafnarfjarðar og OR vegna sölu á hlut bæjarins í HS, segir Stefán Geir Þórisson, lögmaður Hafnarfjarðarbæjar.

Til stóð að kalla til átján vitni en vegna mótmæla lögmanns OR hefur þeim verið fækkað. Vitnin eiga meðal annars að bera um það hvað bjó að baki þegar samið var um kaupin, sem getur skipt máli fyrir túlkun á samningnum segir Stefán.

Hafnarfjarðarbær krefst þess að OR standi við samning um kaup á 15,4 prósenta hlut bæjarins í HS á samtals 7,6 milljarða króna. Nær öruggt má telja að verðmætið er mun minna í dag.

OR vill að samningurinn við Hafnarfjarðarbæ gangi til baka, þar sem samkeppnisyfirvöld hafi komist að þeirri niðurstöðu að hann brjóti í bága við lög, segir Þórunn Guðmundsdóttir, lögmaður OR í málinu. Hún segir engan ágreining um málsatvik, og því í raun óþarft að kalla til vitni.

- bj