Vaxandi spenna í þinghúsinu

Fæðing nýrrar ríkisstjórnar virðist ganga treglegar en búist var við. Framsóknarmenn voru ekki sáttir við þau drög að nýjum ríkisstjórnarsáttmála sem þeim voru kynnt í morgun. Þeir fengu ný drög til skoðunar í hádeginu og fundar þingflokkur Framsóknarflokksins um þau.

Sumir höfðu jafnvel búist við því að Ingibjörg Sólrún Gísladóttir færi til Bessastaða í hádeginu til þess að tilkynna forseta um að samkomulag væri í höfn. Jóhönnu Sigurðardóttur yrði þá falið umboð til stjórnarmyndunar.

Engar fregnir hafa hins vegar borist af því að sá fundur hafi verið boðaður og segir fréttamaður Stöðvar 2 sem staddur er í þinghúsinu að vaxandi spennu gæti á göngum hússins.

Jóhanna Sigurðardóttir og Steingrímur J. Sigfússon hafa farið af fundinum sem staðið hefur í þinghúsinu undanfarna daga og er talið að þau hafi farið til fundar við Ingibjörgu Sólrúnu Gísladóttur.

Heimildir herma að framsóknarmenn vilji fá ítarlegri tillögur um hvernig taka eigi á efnahagsmálum í væntanlegum stjórnarsáttmála og að þeim hafi fundist sáttmálinn heldur rýr í roðinu. Hagfræðingarnir Jón Daníelsson og Ragnar Árnason sem hafa verið þingflokknum til ráðgjafar funduðu með honum í dag og eru þeir nýfarnir af fundinum.