Össur vill selja útlendingum virkjanir

Virkjun við Búðarháls til að mæta óskum álversins í Straumsvík um meiri raforku er umfangsmesta framkvæmd sem nú eru í pípunum hérlendis en Landsvirkjun hugðist bjóða verkið út nú í ársbyrjun. Lánamarkaðir eru hins vegar frosnir og Landsvirkjun treystir sér af sömu ástæðu heldur ekki í rannsóknarboranir í Þingeyjarsýslum vegna álvers á Bakka.

Össur Skarphéðinsson iðnaðarráðherra hefur um nokkurt skeið freistað þess að höggva á hnútinn með viðræðum við erlenda aðila, og vísar til nýlegra lagabreytinga sem opna á eignarhald útlendinga á virkjunum án þess þó að þeir geti átt orkulindirnar sjálfar. Í samtali við Stöð 2 kveðst hann tilbúinn að skoða alla hluti ef það megi verða til þess að skapa atvinnu og tekjur.

Össur skýrði frá því á Alþingi fyrir tveimur vikum að þrjú alþjóðleg fyrirtæki hefðu í janúar rætt við stjórnvöld um að fjárfesta í virkjunum hérlendis. Hann telur að íslenskir lífeyrissjóðir gætu einnig komið að þessu sem og álfyrirtækin.

Stjórnarskiptin um helgina hafa ekki dregið úr áhuga iðnaðarráðherrans.