Það verður að skapa störf

Það var öllum orðið ljóst að fyrri ríkisstjórn var orðin óstarfhæf, sagði Birkir J. Jónsson, þingmaður Framsóknarflokksins, í umræðum um stefnuræðu forsætisráðherra á Alþingi í kvöld. Birkir sagði að ríkisstjórnin hefði verið haldin ákvarðanarfælni í mjög mörgum mikilvægum málum sem snertu land og þjóð.

Þá sagði Birkir að heil kynslóð hefði ekki kynnst íslensku samfélagi án þess að Sjálfstæðisflokkurinn væri við völd. Það hefði því verið þörf á breytingum og meðal annars á þeim forsendum hefði Framsóknarflokkurinn ákveðið að verja ríkisstjórn Samfylkingarinnar og Vinstri grænna með ákveðnum skilyrðum. Framsóknarflokkurinn myndi veita góðum málum brautargengi, sama hvort þau kæmu frá stjórn eða stjórnarandstöðu.

Þá sagði Birkir að ekki mætti leggja stein í götu verkefna sem gætu skapað gjaldeyri. Það yrði að skapa störf í því atvinnuleysi sem nú væri að myndast.