Nýjar brýr yfir Hvítá og Þjórsá boðnar út

Fyrir íbúa sveitanna og þorpanna í uppsveitum Árnes- og Rangárvallasýslu styttast leiðir verulega með þessum tveimur nýju brúm, og nýir ferðamöguleikar skapast sem þúsundir sumarhúsagesta og tugþúsundir ferðalanga eiga væntanlega eftir að nýta sér á hverju ári.

Þannig mun leiðin milli Flúða og Hellu styttast um hátt í 20 kílómetra. Leiðin milli Flúða og Reykholts í Biskupstungum er 35 kílómetra löng um Iðubrú hjá Laugarási en verður aðeins 9 kílómetrar með nýrri Hvítárbrú við Bræðratungu. Með henni verður aðeins nokkurra mínútna skottúr milli Reykholts og Flúða en þorpin, sem bæði státa af sundlaug, grunnskóla og garðyrkjustöðvum, eiga það einnig sammerkt að þjónusta ferðamenn og dvalargesti nokkurra stærstu sumarbústaðasvæða landsins.

Nýja brúin yfir Þjórsá verður á móts við Árnes, en Vegagerðin reisir hana í samstarfi við Landsvirkjun. Stefnt er að því að nýja Þjórsárbrúin verði boðin út í vor, samkvæmt upplýsingum Vegagerðarinnar.

Áætlað er að brýrnar ásamt vegarlagningu kosti samtals um tvo og hálfan milljarð króna og báðar eiga að vera tilbúnar á síðari hluta næsta árs.